Kusolwa ukudliwa kwemali ngodlame lwamatekisi emnambithi
AHLALELE ovalweni amalungu omphakathi wasemnambithi,
kulandela ukudubula okuthiwa kuhlobene nodlame lwamatekisi okwenzeke enkabeni yedolobha ngomgqibelo.
Kuthiwa luqale phansi udlame oluke lwadla lubi ngaphansi kukasoseshini iklipriver nyakenye. Kumavideo abesabalele ezinkundleni zokuxhumana, abantu babonakale bebaleka bengena ezitolo eziseduze, bezama ukuziphephisa.
Amalungu omphakathi aphawule ezinkundleni zokuxhumana, umamphazima Swazi uthe: “Kwenzekeni ngempela emnambith.”
Ufaith Mbhele yena uthe: “Umnambithi awuvalwe, sekukuningi kakhulu okwenzekile.”
Umariwa Mhlanga yena uthe: “Sengathi impi emnambithi iqala phansi.”
Isolezwe lithole ukuthi udlame lumayelana nokudliwa kwemali ngaphakathi kusoseshini waseklipriver, kanti nabahlaselwayo, abebesekomitini elidala, elihlakazwe ngasekupheleni konyaka odlule.
Okhulumela isouth African National Taxi Association (SANTACO) Kwazulu-natal umnuz Sfiso Shangase, uthe kusemuncu.
“Irenki okudutshulwane kuyo, isetshenziswa abaseklipriver. Umbango ungaphakathi kusoseshini. Abaholi bethu bake bangenela, bayohlala khona, inyanga,” kusho ushangase.
Uthe inhloso kwakungukuthi kuqhanyukwe nendlela yokuthi kubekhona uzinzo.
“Kwakukhona izinsolo zokuthi kukhona ukudliwa kwemali yikomiti ebelikhona. Lokhu kwaholela ekutheni kugcine kufakwa abacwaningimabhuku, laphinde lahlakazwa nalelo komiti elalikhona ngaleso sikhathi,” kusho ushangase.
Uthe manje sebeqaphela ukuthi sekuhlaselwa bonke ababeyingxenye yobuholi (kulelo komiti elahlakazwa).
Uphinde wakuvuma ukuthi bayazi ngosomatekisi odutshulwe ngolwesine, wathi uyilungu lekomiti elisha.
Ngasekupheleni konyaka odlule, Isolezwe labika ngokushiswa komuzi womfelokazi kasomatekisi, naye owafa ngakho ukudutshulwa.
Ushangase uthe sebeyekelele ezandleni zamaphoyisa ukuthi umthetho usebenze, wathi bona abangakusho nje ukuthi banxusa ukuthi kube khona uzinzo nokuthula.
Ngo-ephreli nyakenye, ungqongqoshe wamaphoyisa umnuz Bheki Cele uke wahambela le ndawo ngalo udlame lwamatekisi. Kulo soseshini umbango kwavela ukuthi umayelana nokubangwa kwemizila namaphemithi okusebenza. Ohambeni lukacele, izinhlaka ezazingaboni ngasolinye zaze zasayina isivumelwano sokubeka phansi izibhamu.