Sizovalwa ubettina Wethu isikhala somdlalo unikiwe
UKHONJWA esiteshini sakwa-e.tv umdlalo ubettina Wethu ozakhele igama amasizini amathathu KWISABC nozovala isikhala somdlalo inikiwe.
Ukungenzi kahle kwalo mdlalo obukhonjiswa ngomsombuluko kuya kulwesihlanu, kwenze waqedwa njengoba muva nje kuvele nezinkinga zokuthi kudliwa imali kuwo futhi nabalingisi abaholi.
Abakwa-e.tv baveze ukuthi bakujabulele ukwamukela lo mdlalo oqala namhlanje kulesi siteshi ngo-6.30 ntambama.
Uleo Phiri ongomunye wophrojusa balo mdlalo okhiqizwa inkampani iknown Associates Entertainment, uthe bakujabulela ukuthola ikhaya elisha wangazichaza izizathu ezibenze bathatha lesi sinqumo.
“Lo mdlalo ujabulisa abantu abaningi kakhulu kuleli, ikakhulu intsha. Lobu budlelwano esibuqala manje nalesi siteshi siyakholelwa ukuthi buya kude futhi buzothela izithelo ezinhle. Ngakho kuyasijabulisa ukuphinde sethule isizini entsha ebingeke ke ibe yintsha uma bungekho ubuso obusha kuwo njengoba sethulela ababukeli bawo abalingisi okukhona kubo uprince Grootboom ozolingisa indawo kaxhanti no-amanda Semone yena ozobe elingisa indawo kakhethiwe Phakade,” kusho uleo.
Uthe uxhanti ungowesilisa omuhle, owakhiwe kahle futhi oyisifundiswa esisezingeni eliphezulu.
“Uphuma ekhaya elimi kahle uma kuziwa ngakwezezimali njengoba umndeni wakhe uthe shi kwipolitiki futhi waziwa emkhakheni wamabhizinisi e-eastern Cape.
“Ngakolunye uhlangothi, ukhethiwe ungowesifazane okholelwa ekutheni angashintsha abantu abaningi ukuthi bathande into ethandwa nguye. Wenza kahle emkhakheni wezokukhangisa akuwona futhi uzibona eyingozi kwabanye ontanga yakhe. Sijabula nababukeli ke ngoba bazozibonela ukuthi laba bobabili baphetheni,” kuchaza yena.
Uthe abalingisi abafana nolunga Tshabalala basabuya kulo mdllao nabanye ababonakale kumasizini adlule.