I-ANC nesinqumo ngomasipala abangasebenzi
KUNGASE kuhlukane inhloko nesixhanti komasipala I-ANC ebabusa ngokubambisana namanye amaqembu ezepolitiki osekuvele ukuthi iningi labo zimapeketwane izinto kubona.
Lokhu kuvele esithangamini nabezindaba sethimba likazwelonke LE-ANC, inational Coalition Task Team embombela, empumalanga, ngempelasonto.
Ilungu lethimba, umnuz David Makhura, lithe babheka umasipala ngamunye kwabangu-81 ababusa khona ngokubambisana.
Umakhura ukusho wangangabazi, wathi zimapeketwane izinto komasipala abaningi lapho bephethe khona ngokubambisana.
Uthe isimo siya ngokuba simbi kusukela ngo-2021, ngakho isigungu esiphezulu SE-ANC kuzomele sithathe izinyathelo ezinqala.
“Emasontweni amabili ezayo sizophothula umbiko esiwenzayo, bese siwudlulisela esigungwini esiphezulu (NEC) ukuze sithathe isinqumo. Okuzolandela lapho kuyobe kwesekwa wubufakazi, singalawulwa yimizwa futhi kuyobe kungadlalwa politiki,” kusho umakhura.
Ukhuluma kanjena nje umakhura, ubuholi BE-ANC kuzwelonke bukanise embombela, empumalanga, lapho izoba nomgubho weminyaka engu-112 kwasungulwa le nhlangano ngempelasonto.
Lona umgubho waminyaka yonke, owaziwa ngokuthi ijanuary 8.
Eminye yalabo masipala I-ANC ebabusa ngokubambisana ngowasethekwini, lapho ibambisene khona NE-EFF namanye amaqembu amancane.
Kamuva, imeya yetheku, umnuz Mxolisi Kaunda, isanda kukhala ngokuthi kulikhuni ukubusa umasipala ngokubambisana namanye amaqembu.
Ukaunda wathi ezinye izinhlelo zentuthuko ziyabambezeleka ngoba kumele uqale uxoxisana nosuke uphethe nabo, akufani noma I-ANC isuke iphethe yodwa.
Leli thimba okukhona kulo nowayeyimeya yasegoli, umnuz Parks Tau, libunjwe ngo-ephreli 2023.
Ithimba liqale umsebenzi walo ngonovemba nyakenye, emuva kokuthi ngo-okthoba 2023, isigungu esiphezulu SE-ANC saphasisa lokhu.
“Sibheka umasipala ngamunye lapho I-ANC ibusa khona ngokubambisana namanye amaqembu kuhlanganisa nomasipala abakhulu. Kwezinye izindawo okubuswa khona ngokubambisana isimo semiphakathi siya ngokuba simbi kakhulu kusuka ngo2021,” kusho umakhura.
Uqhube wathi abakwazi ukuba yingxenye yombimbi olungayisebenzeli imiphakathi futhi abafuni ukubusa namaqembu amagama awo anogcobho ngoba kuthunaza igama likakhongolose.