Bekuwunyaka onzima kwezempilo
UKUPHASISWA komshwalense wezempilo obhekelele bonke abantu, inational Health Insurance (NHI), ephalamende kubajabulisile abanye ngoba kusho ukuthi kuqala uhambo olubheke ekutheni bonke abantu bathole ukwelashwa ngendlela efanayo, kungakhathalekile ukuthi banemali noma abanayo Kodwa-ke ngakolunye uhlangothi abasemkhakheni wezempilo ozimele bathi
INHI ngeke isebenze isami ngendlela eyiyo kuleli futhi bathi kunemifantu eminingi mayelana nokuthi izosebenza kanjani.
Izinhlangano zodokotela nabamele ama-medical aid kuleli banxusa umengameli ukuthi angasayini ukuthi uhlelo luqale ukusebenza.
Akubona odokotela abazimele kuphela abakhathazekile ngokuqala kohlelo nabaluthandayo banalo uvalo. Bakhathazwa ukuthi kungase kwenzeke into efanayo neyenzeke ngesikhathi kuhlasele icovid-19, lapho ingxenye yemali okwakumele isize umphakathi yagcina ikhwatshaniswa.
Umnyango wezempilo wona ujabulile ngokuphasiswa kwayo, kodwa ukhala ngokuthi kumele ukusebenza kwayo kuqalwe ngezikhawu obona sengathi kuzokwenza uhlelo lucothoze.
U-2023 kwezempilo bekuwunyaka ofake ingcindezi ezikhungweni zezempilo ngenxa yokuhlasela kwezifo.
Ngomeyi kubheduke isifo sohudo, i-cholera, ehammanskraal okuholele ekutheni kushone isiguli ezingu-23, ezingaphezulu kuka200 zelashelwe lesi sifo.
Kule ndawo bekusolwa ukuthi amanzi angahlanzekile aphuzwa ngumphakathi ukuthi yiwona ayimbangela.
Kugcine kungavelanga kahle-hle ukuthi iziguli ezilaliswe ezibhedlela nezishonile ziguliswe ngamanzi angahlanzekile yize bekuvela ukuthi ingqalasizinda yamanzi kule ndawo ayikho esimeni.
Izinkinga zamanzi azigcinanga ngokusoleka ekutheni zidale i-cholera, egauteng. Kuso lesi sifundazwe umnyango wezempilo ukhiphe umbiko owethuse abaningi, oveza ukuthi ukushoda kwamanzi ngenxa yengqalasizinda efaka amanzi ezibhedlela engekho esimeni kuholele ekutheni kuhlehliswe ukuhlinzwa kweziguli ezingu-392 obekuhleliwe.
Kulo nyaka umgcinimafa kazwelonke umemezele ukuthi iminyango kuzomele ibophe izifociya ngoba imali ayikho kuhlanganisa nomnyango wezempilo.
Ukuncishiswa kwesabelomali kushaye kwezwela ngoba kudingeke ukuthi umise ezinye izinhlelo zawo, kuzo okubalwa ezehiv, ukugcwalisa izikhala zemisebenzi ezikhona nokunye.
Muva abanye odokotela abangamathwasa okumele ngabe sebethathiwe ukuze bayoqeqeshelwa umsebenzi ezikhungweni zezempilo ngonyaka ozayo, akwaziwa ukuthi bazongena nini kulolu hlelo ngoba umnyango awunayo imali yokubakhokhela.
Olunye udaba olube ngundabamlonyeni olokuthi iningizimu Afrika yakhokha imali engaphezulu kweyayikhokhwa ngamanye amazwe ithenga imigomo yecovid-19, ekubeni ingxenye yaleyo migomo yaze yadlulelwa isikhathi sokuthi isetshenziswe umphakathi ungayi kogoma, yagcina ilahliwe.
Amathe abuyele kwasifuba kulabo ebenethemba lokuthi sekuduze kutholakale ikhambi lokwelapha IHIV, ngoba abacwaningi bamise ucwaningo obelwenziwa e-afrika kubhekwa ukuthi imishanguzo ethile esetshenziselwa ukuvikela leli gciwane ingakwazi ukuthi iphendulwe ibe wumgomo.
Abacwaningi bathe alikho ithemba lokuthi le nhlanganisela yemishanguzo ingawaqinisa amasosha uma isiwumgomo. Ngonyaka ozayo abacwaningi bathe basazoqhubeka nokucwaninga eminye imithi ngeke baphele amandla kuze kube liyaqhamuka ikhambi.