Isiyabadida abesharks eyokubhacaza ekuhambeni
BASAQHUBEKA nokuzinwaya amakhanda abadlali nabaqeqeshi behollywoodbets Sharks ngenxa yemiphumela engemihle etholwa yileli qembu kule sizini, ikakhulukazi ekuhambeni.
Isharks iphinde yashaya udaka emdlalweni wesibili wechallenge Cup lapho iqunjwe phansi yitoyota Free State Cheetahs ngo 32-29, efree State Stadium ngesonto ntambama.
Kuyiwe ekhefini icheetahs ihamba phambili ngo 15-7, isharks yabuya ngesiwombe sesibili yaze yahamba phambili ngo 29-27 kodwa kwayibhedela ngasekupheleni komdlalo ngesikhathi icheetahs ithola i-try eshaywe yinyamazane yayo ujasper Cohen.
Lokhu kuchaza ukuthi isharks isihlulwe emidlalweni eyisikhombisa kweyisishiyagalolunye eyidlalile. Ikhale ngaphansi kweyisithupha ye-united Rugby Championship, nowodwa wechallenge Cup.
“Sizenzele izinto zaba nzima kakhulu ngokuhlukela ukuqinisa kuma-scrum nakuma-line out. Sidlala umbhoxo omuhle ekhaya kodwa asizange sikwenze lokho kulo mdlalo,” kusho umqeqeshi, ujohn Plumtree.
“Asiwasebenzisanga ngendlela efanele amathuba ethu, ikakhulukazi uma kufanele sidudule kuma-scrum noma siphonse ibhola kuma-line out. Lezo yizingxenye zomdlalo ezibucayi futhi uma uhluleka ukwenza kahle kuzona uzithola usungaphansi kwengcindezi.
“Senze lawo maphutha sibhekene nebulls (kwi-urc) saphinde senza okufanayo kowecheetahs. Leyo yingxenye ebalulekile yomdlalo wethu esingakayilungisi okwamanje.”
Isharks iibingene kulo mdlalo ithwelwe ngeqoma kulandela ukubhaxabula kwayo ipau yasefrance emzuliswaneneni wokuqala wechallenge Cup.
Ezikaplumtree bezibophele abadlali bamabhokobhoko abangu-10 eqenjini lazo kanti kwicheetahs bekukhona uruan Pienaar oseneminyaka agcina ukugqoka ijezi lesizwe.
Ufrancois Venter, odlala kwi-centre eqenjini isharks, uthe akusizi ngalutho ukuba nenqwaba yabadlali abaziwayo uma behluleka ukubambisana enkundleni.
“Singabadlali siyahluleka ukwenza okulindelekile kumdlali ngamunye. Sidinga ukudlala njengeqembu elihlangene. Sinabadlali abavelele kodwa siyaliphoxa iqembu ngokungenzi lokho okufanele sikwenze,” kusho uventer.
“Siyakwazi ukudlala kahle ekhaya kodwa sisahluleka ukubamba umgqigqo ekuhambeni. Yisikhathi sokuthi sivume amaphutha ethu futhi sivuke emdlalweni olandelayo.”
Isharks izoba nesikhathi sokulungisa amaphutha ayo njengoba iyoze idlale ngodisemba 30, ibhekene NEDHL Stormers, ecape Town Stadium.