JERUSALEM GIBAHARAN NI CASTILLO
Nibuhi og mahagitong mga pulong si Mexican Luis Angel Castillo ngadto ni Filipino world champion Melvin Jerusalem sa ilang panagtagbo sa Philippine Sportswriters Association (PSA) Forum sa Rizal Memorial Sports Complex niadtong Martes, Septiyembre 17, 2024.
Gipahimangnuan ni Castillo si Jerusalem nga pahimuslan ang nahabiling pipila ka mga adlaw niini isip usa ka world champion.
Pinaagi sa usa ka interpreter, nagkanayon si Castillo nga masaligon siya nga iyang mailog ang World Boxing Council (WBC) minimumweight title ni Jerusalem sa ilang panagharong ibabaw sa ring karong Dominggo, Septiyembre 22, 2024, sa Mandaluyong City College gym.
Hinuon, giangkon ni Castillo nga dili kini sayon nga tahas alang kaniya.
“Mag-enjoy din siya dito sa Pilipinas at nakarating siya dito. Tingnan na lang natin sa laban,” tubag ni Jerusalem sa giingon ni Castillo nga napatik sa philboxing.com.
Sa forum, kauban ni Jerusalem ang iyang trainer nga si Michael Domingo ug handler JC Mananquil sa Sanman Promotions samtang kauban ni Castillo ang iyang trainer nga si Eduardo Montiel.
Usa kini ka mandatory defense ni Jerusalem sa korona nga iyang naangkon pinaagi sa split decision nga daog batok ni Japanese Yudai Shigeoka niadtong Marso, 2024 sa Nagoya, Japan.
“Pagka-champion pa lang ni Melvin alam na namin na siya (Castillo) yung mandatory. Kaya nag-ready na kami. Kaunting bakasyon muna, tapos nag-start na kami ng training, Nagawa naman namin ng maayos lahat sa training, kaya ngayon ready na kami sa laban,” pasabot ni Domingo.
Si Jerusalem, 30, naggunit og 22-3, 12KOs nga rekord samtang si Castillo, 27, adunay 21-0-1, 13 KOs.