Pagkatapulan, hugawan hinungdan sa polusyon
Sa pagsugod sa ting-uwan, dili ikalimod dungan niini ang pagtumaw sa baha ug pagsuyla sa kasapaan, usa sa nag-unang hinungdan mao ang mga barado nga drainage o culvert gumikan sa tapok sa mga basura.
Apan usa nga epektibo nga paagi sa katuyoan aron nga masolusyonan ang suliran sa basura mao ang pagbutang og ‘bio-fences’ nga mo-trap sa mga basura diha sa mga sapa ilabi na sa dakbayan sa Sugbo.
Ang ‘bio-fences’ ibutang sa sapa nga magsilbi’ nga barrier o pugong sa mga basura nga dili molahos ngadto sa kadagatan.
Usa ang Barangay Pasil, Cebu City ang mipatuman sa maong pamaagi. Si Constantino Ostulano, Pasil barangay administrator nagkanayon nga ilang giawhag ang ubang barangay nga mohimo sa susamang paagi aron nga mas epektibo nga masulbad ang nagtipun-og nga mga basura nga mobara sa mga agianan sa tubig.
Sa maong paagi, masuta sab og kinsa kadtong barangays nga nagpasagad sa ilang waste management, ug maklaro sab kadtong residente diin nasakop nga barangay nga kuwang sa disiplina ug way konsensiya nga mobalibag sa ilang basura ilabi na ngadto sa sapa.
Base sa Environmental Management Bureau sa Department of Environment and Natural Resources (EMB-DENR) 7 nga ang sapa sa Guadalupe ang gihulagway nga ‘highly contaminated’ gumikan sa nagsagol nga domestic water ug solid waste gikan sa mga residente.
Angayan lang nga ang matag barangay adunay ilang kaugalingong solid waste management plan.
Mas epektibo sab nga solusyon ilabi na nga magsugod sa matag residente ang disiplina, aron nga dili na mograbe ang suliran.
Apan niadtong way pagpakabana, mahulagway nga tapulan o hugawan ba kaha?