Ex-con, ‘gun for hire’ nadakpan og balik
Suspetsado sa mga kaso sa pagpamusil sa Barangay Tisa, dakbayan sa Sugbo ug giila sa kapulisan nga gun for hire ug nakombikto sa kaso sa illegal nga drugas, nadakpan og balik sa kapulisan sa Labangon Police Station, alas 9:00 sa gabii, Sabado, Hulyo 13, 2024, sa Purok Sambag sa nahisgotang barangay.
Ang malampusong operasyon ubos sa pagpangulo sa hepe sa Labangon nga si Police Major Eraño Regidor.
Ang nasikop giila sa mga silingan niini nga si Crisinciano Dionson Maranga Jr. alyas Pangga, 44, ug nagpuyo sa samang lugar.
Nakuha gikan kaniya ang mga pinakete sa gituohang shabu nga motimbang sa 25 gramos nga dunay standard drug price nga P170,000 ug usa ka black widow 9mm caliber revolver nga loaded og duha ka bala niini.
Matod ni Regidor, si Maranga maoy gitudlo nga responsable sa pagpusil-patay kang Jomar Codilla Martin alyas Joshua niadtong Mayo 27, 2024 sa Sitio San Pedro, Barangay Tisa, siyudad sa Sugbo ug napasakaan og kasong murder.
Siya usab ang gitumbok sa ubang pagpamusil sa mga silingang barangay nga sakop sa laing police station apan wala lang mopasaka ang mga kabanay tungod kay nahadlok sa suspetsado nga sila na usab ang targeton sa pagpamusil.
“Daghan nanig gipusil diha sa Tisa, dili lang mo-file og kaso ang mga kabanay kay hadlok, kahadlokan man gud ni sa Barangay Tisa nga motira gyud,” matod ni Regidor.
Giawhag ni Regidor ang mga kabanay niadtong gipangpusil ni Maranga nga moadto sa ilang buhatan aron mopasaka og kaso dungan sa pasalig nga dili angayan nga mahadlok kay nabalhog na kini sa selda sa police station.
Gawas sa iyang pagka gun for hire sa usa ka dakong drug personality, namaligya usab kinig illegal nga drugas sa Tisa gani siya ang tinubdan sa ubang mga drug player sa mga silingang Sitio.
Kalapasan sa Section 11, Article 2 Republic Act 9165 ug Republic Act 10591 kun kalapasan sa Comprehensive Firearms and ammunition Regulation Act, ang atubangon nga kaso sa suspetsado.