Suportahan ang Palaro
Buksan na karong hapon ang Palarong Pambansa 2024 pinaagi sa usa ka parade latas sa Osmeña Blvd. padulong sa Cebu City Sports Center (CCSC). Sentro karon ang Palaro di lang tungod sa kadaghan sa mga atleta ug ilang mga kuyog nga nihugpa dinhi, kon di sa mga isyo nga naghamok sa pagpangandam sa Dakbayan sa Sugbo.
Gilaliman ka, usa ka tuig human gisirhan ang pasilidad, wa pa diay matrabaho ang oval track. Nagdali-dali ang contractor sa pagtrabaho human nimando si Cebu City Acting Mayor Raymond Alvin Garcia sa pagsugod na niini.
Usa ka tinubdan niingon nga unta ang pagtrabaho sa oval track kinahanglan nga nasugdan unom ka mga buwan sa di pa kini gamiton kay dunay “curing period” nga gikinahanglan aron mas lig-on kini.
Sagdi na lang, natrabaho ug nahuman na man, tutokan na lang ang pagpahigayon sa Palaro nga hapsay, ug way dagko nga mga kakulian nga mahitabo.
Apan magsilbe na unta kini nga leksyon sa kagamhanan ang nahitabo sa CCSC. Kay dako kaayo nga usik ang pagsira sa track oval nga maoy nakaingon nga ang mga runner sa Dakbayan sa Sugbo nga nangapil miaging Central Visayas Regional Athletic Association (CVIRAA) nagmantinil og suok nga karsada sa ilang pag-practice.
Aron masayran kon unsa ang tinuoray nga rason sa kalangay, maayo nga susihon sa Konseho ang tinuoray nga rason nganong kini nahitabo? Tumong niini aron di na masubli o malikayan ang sama nga hitabo.
Kon tan-awon, wa lang kini mahitabo sa CCSC, nasinati na sab kini sa Siyudad sa nangagi nga duha ka mga Sinulog nga gipahigayon sa South Road Properties (SRP). Nagkara-kara ang Siyudad niadtong 2022 nga Sinulog nga pipila na lang ka semana, wa pa natrabaho ang dapit nga pahigayunan.
Mao ni ang gihimo nga rason ni Gobernador Gwendolyn Garcia nga sa Carmen niapil sa Sinulog inay sa Dakbayan sa Sugbo. Sa 2023, mao lang gihapon, nagkara-kara sa pagpangandam ang Siyudad sa dapit.
Maora og salida sa sine, thrilling kaayo kon mahuman ba o di. Nahuman man tuod, apan dinadali-dali ang pagtrabaho.
Maayo gani sa Palaro kay ang Siyudad dunay kaabag sa pagpangandam nga mao ang Dept. of Education (DepEd 7) nga niseguro sab nga mahan-ay ang mga dapit nga kapuy-an sa mga atleta ug mga staff. Kay kon wa pa, basin nagkayamukat sab tingali ang pagpangandam.
Karon, ang Siyudad man ang host, inabagan sa mga Dakbayan sa Mandaue, LapuLapu ug Kagamhanan sa Probinsya sa Sugbo, ipadaplin una ning mga kontrobersiya, tutokan ang pagpahigayon sa Palaro.