Beauty pageant candidate, uyab namatay sa pagpusil
Mga samad pinusilan ang namatyan sa usa ka kandidata sa beauty pageant ug sa iyang Israeli nga boyfriend.
Gibutyag sa National Bureau of Investigation (NBI) sa Dominggo, Hulyo 7, 2024, nga namatay ang kandidata sa beauty pageant nga si Geneva Lopez ug iyang kauban nga Israeli nga si Yitshak Cohen tungod sa mga samad pinusilan.
Ang duha ka mga biktima nakaangkon og duha ka mga samad pinusilan matag usa, sumala sa resulta sa autopsy nga ilang gipakita sa media.
Si Lopez gipusil sa likod nga bahin sa iyang lawas ug wala nga paa nga miresulta sa pagkabali.
Si Cohen nakaangkon og samad pinusilan sa iyang walang dughan ug duol sa iyang ilok.
Niadtong Sabado, Hulyo 6, 2024, nakit-an sa mga otoridad ang mga lawas nila ni Lopez ug Cohen sa usa ka hilit nga quarry site sa Capas, Tarlac.
Ang hepe sa Public Information Office sa Philippine National Police (PNP) nga si Colonel Jean Fajardo niingon nga ang mga lawas nila ni Lopez ug Cohen giugkat gikan sa quarry site sa Barangay Sta. Lucia, Capas, Tarlac.
Si Fajardo niingon nga lima ka mga indibidwal, lakip ang duha ka kanhi polis, kasamtangang gikustodiya sa kapulisan tungod sa giingong kalambigitan nila sa pagpatay sa magtiayon.
Matod niya nga ang duha ka mga polis ug laing suspek nasikop sa sayo pa niadtong adlawa tungod sa illegal possession of firearms.
Sa interbyo sa radyo, si NBI Director Jaime Santiago niingon nga sila si Lopez ug Cohen parehong nakaangkon og duha ka samad pinusilan.
Si Santiago niingon nga ang mga bala nga nakit-an sa lawas sa mga biktima gipaubos sa ballistics examination.
Sa laing bahin, si Criminal Investigation and Detection Group (CIDG) director Major General Leo Francisco niingon nga ang breakthrough sa imbestigasyon mao ang pag-surrender sa drayber sa duha ka kanhi mga polis kinsa nitudlo sa kapulisan sa dapit diin ilang gilubong ang mga lawas sa magtiayon.
Katapusang nakit-an sila si Lopez ug Cohen niadtong Hunyo 21 sa wala pa sila nipaingon sa Barangay Armenia sa Tarlac City aron mag-scout sa usa ka property nga ilang paliton.