SANTISIMA GABANGIS SA MASBATE
Atubangan sa iyang mga katagilungsod, natuman ni Jeo “Santino” Santisima ang iyang panaad.
Si Santisima, kinsa natawo sa Aroroy, Masbate, nirehistro og makapaukyab nga kadaugan sa main event sa “Bakbakan sa Masbate 2” nga gipresentar sa ATK Promotions ni Governor Antonio Kho niadtong Sabado sa gabii, Hunyo 22, 2024, sa The Lagoon sa Cataingan, Masbate.
Ning maong tahas, giilog ni Santisima ang World Boxing
Council (WBC) Asia Continental super featherweight crown pinaagi sa 4th round knockout nga kadaugan batok ni Thai Arnon Yupang.
Si Santisima, kinsa kanhi sakop sa nabungkag nga ALA
stable sa Cebu City ug kasamtangang sakop sa ZIP/Sanman Gym sa General Santos City, agresibo na nga miaway gikan pa lang sa sinugdanan.
Sa ika-2:01 minutos nga marka sa 4th round, usa ka
left body shot ni Santisima ang nagpatumba ni Yupang, kinsa wala na nakabarog atol sa pag-ihap sa referee.
Human sa away, si Santisima, kinsa nisaka sa 24-7, 20KOs nga rekord, nagpasalamat sa suportang gihatag sa iyang mga katagilungsod hilabi na ni Kho. Gipasabot sa kanhi world title challenger nga determinado gyud siya nga makarehistro og knockout nga kadaugan alang sa iyang mga katagilungsod.
Nagkanayon si Santisima nga kon mahatagan siya’g laing oportunidad nga makapanuktok alang sa world
title human ning awaya, andam siya niini.
Sa undercard, nidaog sab ang manghod ni Jeo nga si Alex (9-1, 3KOs), kinsa nipaundang ni Justine “Philippine Tiger” Darap (11-6, 7KOs) sa 2nd
round sa inilugay sa World Boxing Foundation (WBF) Australasian super flyweight belt.
Si Michael “Hot N’ Spicy” Dasmarinas (35-3-2, 25KOs) nipaundang ni Jon Jon “Wolverine” Estrada (18-13-1, 14KOs) human sa 9th round aron angkunon ang Philippine featherweight throne.
Naangkon ni Esneth “Hard Hitter” Domingo (20-2, 12KOs) ang WBC Asia flyweight belt pinaagi sa 2nd round TKO nga kadaugan.
Nitali sab og 2nd round TKO nga kadaugan si Alvin Camique (9-2, 4KOs) batok ni Ben “Sniper Ben Fairtex” Ligas (16-5, 10KOs) aron kuhaon ang WBF International super flyweight title.