З работамі па ўстараненні наступстваў стыхіі азнаёміўся Прэзідэнт Беларусі
Аляксандр Лукашэнка ў Мазырскім раёне Гомельскай вобласці 2 жніўня азнаёміўся з ходам работ па ўстараненні наступстваў стыхіі, ад якой у ліпені пацярпеў гэты і шэраг іншых рэгіёнаў краіны.
Прэзідэнт Беларусі на месцы азнаёміўся з работамі па распрацоўцы бураломных лесасек. Як расказалі ў Міністэрстве лясной гаспадаркі, усяго ў выніку стыхіі пашкоджана больш за 41 тыс. га лесу. Суцэльнай высечцы падлягаюць 18 тыс. га. З іх 14 тыс. га знаходзяцца менавіта ў найбольш пацярпелай Гомельскай вобласці. Цяпер у рэгіёне працуюць спецыялісты з 80 лясгасаў. Усяго па краіне плануецца нарыхтаваць больш за 5 млн куб. м драўніны з пашкоджанага стыхіяй ляснога фонду.
Раней устараненне наступстваў стыхіі і рэагаванне на такія надзвычайныя сітуацыі стала прадметам дэталёвага абмеркавання на селектарнай нарадзе ў Прэзідэнта, якая прайшла 19 ліпеня. Па яе выніках Аляксандр Лукашэнка 23 ліпеня падпісаў распараджэнне аб устараненні наступстваў небяспечных метэаралагічных з'яў. Дакумент прыняты ў мэтах устаранення наступстваў стыхіі, зніжэння памераў шкоды, нанесенай навакольнаму асяроддзю, і матэрыяльнага ўрону, аднаўлення нармальных умоў жыццядзейнасці насельніцтва. Былі дадзены канкрэтныя даручэнні і абазначаны тэрміны работ па лініі профільных міністэрстваў і аблвыканкамаў.
У прыватнасці, Міністэрства энергетыкі павінна было забяспечыць да 1 жніўня падключэнне да электразабеспячэння ўсіх абясточаных домаўладанняў, да 22 жніўня – перавод часовых схем электразабеспячэння ад дызельных генератарных установак на электразабеспячэнне ад ліній электраперадачы.
Па лініі лясной гаспадаркі былі дадзены даручэнні да 1 лістапада, дзе неабходна, правесці суцэльныя санітарныя высечкі, а да 31 снежня – выбарачныя санітарныя высечкі і прыбраць захламленасць.