Рэдакцыя газеты півя – лепшая ў Брэсцкай вобласці
Па выніках штогадовага спаборніцтва сярод рэдакцый абласных, аб'яднаных, раённых і гарадскіх газет, тэлебачання і радыё, журналістаў Брэсцкай вобласці рэдакцыя газеты «Івацэвіцкі веснік» прызнаная лепшай у вобласці ў сваёй намінацыі. Скарбонку ўзнагарод папоўніў і дыплом загадчыцы аддзела вэб-інфармацыі
Паліны Сауцінай, якая ў рамках спаборніцтва адзначана за актыўную і прафесіянальную работу ў сацыяльных сетках. Дыпломы ад Брэсцкага аблвыканкама сталі чарговым пацвярджэннем таго, што наша рэдакцыя працуе не пакладаючы рук не дарма, што нашы намаганні, рэзультаты працы ўсяго творчага калектыву заўважныя. Аднак працуем мы не дзеля ўзнагарод (яны толькі прыемны бонус) – мы працуем дзеля вас, паважаныя чытачы. Раёнку па се
радах і суботах чакаюць амаль шэсць тысяч жыхароў раёна, а лік нашых падпісчыкаў у сацсетках расце не па днях, а па гадзінах – іх ужо каля 40 тысяч!
Вы расказваеце нам, што калі ў сям’і і муж, і жонка – чытачы раёнкі, дык не можаце вызначыцца, хто будзе чытаць яе першым. Вы расказваеце, што пачынаеце сваю раніцу не з кавы, а з рубрыкі «Добрай раніцы» ў нашым Instagram, каб палюбавацца роднымі краявідамі, паслухаць прыемную музыку і даведацца прагноз надвор’я. Вы з хваляваннем тэлефануеце ў рэдакцыю, калі раптам свежага нумара газеты на аказалася ў вашай паштовай скрыні. Мы часта атрымліваем званкі і паведамленні з падзякамі за нашу працу, за ўдалыя артыкулы, фота- і відэарэпартажы, і гэта акрыляе, надае натхнення. Вы пазнаяце нашых журналістаў на мерапрыемствах і вітаецеся з імі, як з добрымі сябрамі. І раёнка стала для вас сябрам – не толькі крыніцай карыснай і праўдзівай інфармацыі, але і вашым абаронцам, бо да нас можна звярнуцца са сваёй праблемай – і мы зробім усё магчымае, каб дапамагчы.
Шчыра дзякуем вам за давер, за парады, за зваротную сувязь, за тое, што рублём галасуеце за нашу газету, зноў і зноў афармляючы падпіску на яе. Для нашай рэдакцыі гонар стаць лепшай у вобласці ў такі асаблівы год, і мы адчуваем гонар не толькі за сябе, але і за наш Івацэвіцкі раён. Сёлета мы святкуем 80-годдзе вызвалення Беларусі ад нямецка-фашысцкіх захопнікаў і 85-годдзе Брэсцкай вобласці. Дзень беларускага пісьменства ў верасні пройдзе ў нашых Івацэвічах. 85 год спаўняецца і нашай раёнцы, першы нумар якой убачыў свет у 1939 годзе. За гэты час мяняліся назвы і дызайн газеты, спосабы падачы інфармацыі, цяпер, акрамя друкаванай версіі, мы маем інтэрнэт-рэсурсы, расшыраецца наша аўдыторыя, абнаўляецца калектыў. Мы і надалей абяцаем трымаць руку на пульсе жыцця, ісці ў нагу з часам, радаваць вас новымі праектамі, сваёй аб’ектыўнасцю і аператыўнасцю. А вы, паважаныя чытачы, проста заставайцеся з намі, і гэта будзе для нас найлепшым падарункам.
Рэдакцыя «ІВ».