Чаму Вы прымаеце ўдзел у выбарах?
Спыталіся ў выбаршчыкаў Івацэвіцкага раёна
У дні датэрміновага галасавання за кандыдатаў у дэпутаты парламента і мясцовых Саветаў многія жыхары ўжо скарысталіся магчымасцю праявіць сваю грамадзянскую пазіцыю і зрабіць выбар на карысць тых кандыдатаў, якіх лічаць найбольш вартымі. Журналісты «ІВ» пагутарылі з выбаршчыкамі і даведаліся іх меркаванне наконт удзелу ў выбарах.
НІНА АНІШЧЫК, в. Стайкі:
– Не прапускаю ніводнай выбарчай кампаніі, гэта мой грамадзянскі доўг. Нельга быць раўнадушным да лёсу краіны, у якой ты нарадзіўся, вырас і жывеш. і я вырашыла не адкладваць гэтую справу на доўга. Я пенсіянер, ёсць вольны час і ў будзень, таму прыйшла прагаласаваць датэрмінова. Пазнаёмілася з усімі кандыдатамі і зрабіла, лічу, правільны выбар. Наогул выбары – гэта ж свята для вяскоўцаў, і яны праходзяць у нас заўсёды на высокім узроўні. Упэўнена, так будзе і зараз.
АРТУР ІСКРА, г. Косава:
– Я родам з Косава, але галасую на выбарчым участку, што размяшчаецца ў нашым аграрным каледжы, бо зарэгістраваны на час вучобы ў інтэрнаце. Мне 18 гадоў, гэта мой першы ў жыцці ўдзел у выбарах, і прапусціць гэтую падзею я не мог. З праграмамі кандыдатаў нас знаёмілі на куратарскіх гадзінах, да таго ж і самі кандыдаты наведвалі нас у каледжы, праводзілі сходы і расказвалі пра сябе, таму я асэнсавана зрабіў свой выбар.
КАЦЯРЫНА ШЛЯЖКА, г. івацэвічы:
– Я за моцную і квітнеючую Беларусь, таму абавязкова іду на выбары. А ў гэтым годзе і мой сын упершыню будзе галасаваць. Пойдзем таксама датэрмінова разам з ім, падтрымаем яго ў гэты адказны момант. А 25 лютага ў планах паездка ў Рэчкі да свекрыві, яе трэба суправадзіць на выбары. Ведаю, што па стане здароўя па заяўцы выбаршчыка можа наведаць камісія дома, але ўсё ж такі хочацца, каб свякроў пабывала на выбарчым участку і напоўніцу адчула гэтую адказную і прыемную атмасферу.
ТАЦЦЯНА ТРЫНДА, г. івацэвічы:
– Я і ўсе мае родныя заўсёды прымаем удзел у выбарах. Лічу, што пры магчымасці прагаласаваць за кандыдатаў варта загадзя, калі на выбарчым участку менш людзей і мітусні. Усіх кандыдатаў я ведаю, а некаторых нават асабіста, дасканала пазнаёмілася і з іх выбарчымі праграмамі, таму доўга не раздумвала, за каго аддаць свой голас. Я прагаласавала за парадак, мір і спакой у нашай краіне. Для мяне як шматдзетнай маці гэта вельмі важна.
Гутарыла Аксана ЦЯРЭШКА. Фота Валерыя МІСКЕВІЧА.