Вясковае бездарожжа:
Жыхары Міхнавіч скардзяцца на стан дарожнага пакрыцця некаторых вуліц
Але гэтыя радасныя для забудоўшчыкаў акалічнасці ўжо даўно дастаўляюць нязручнасці жыхарам Міхнавічаў. Справа ў тым, што амаль увесь рух і прыватнага транспарту жыхароў гарадскога квартала, і грузавога, што задзейнічаны на правядзенні будаўнічых работ, праходзіць праз вуліцы Гойшыка і Новую Міхнавічаў. Грузавым транспартам раз’езджана дарога, у дажджлівае надвор’е або падчас раставання снегу яна наогул пераўтвараецца ў гразевы паток, а гаспадарскія платы пасля праезду тэхнікі запырсканыя граззю. Пакутуюць ад гэтага і пешаходы, у тым ліку і дзеці, бо на вуліцы ногі гразнуць у брудзе. Летам у сухое надвор’е ўзнікае іншая праблема – клубы пылу: вяскоўцам ні вокны ў хаце адчыніць, ні бялізну ў двары пасушыць, а пра свежае паветра застаецца толькі марыць. Хвалюе жыхароў і бяспека на дарозе, бо па сухой грэйдзіраванай дарозе машыны імчацца з вялікай хуткасцю, а па ёй ходзяць дзеці… І гэтыя праблемы будуць толькі расці, бо зараз пачынаецца будаўніцтва яшчэ аднаго новага квартала – «Міхнавіцкі». Вяскоўцаў хвалюе, што будзе далей, калі з наступленнем цяпла работы ў абодвух кварталах пойдуць актыўней? Ды і гараджане, што атрымалі ўчасткі, таксама зацікаўлены ў арганізацыі добрых і бяспечных дарог у Міхнавічах, бо самі імі актыўна карыстаюцца.
З гэтымі набалелымі пытаннямі і звярнуліся жыхары Міхнавічаў у рэдакцыю. Каб разабрацца ў сітуацыі, 20 лютага міхнаўцы ініцыіравалі сход, на які запрасілі Мікалая Басалая, старшыню Стайкаўскага сельвыканкама, і Максіма Собаля, начальніка ДРБУ-178, на абслугоўванні гэтай арганізацыі знаходзяцца міхнавіцкія вуліцы.
– У межах гарадской забудовы праектаваннем прадугледжваецца і ўзвядзенне дарог, а вось вясковыя вуліцы застаюцца па-за ўвагай. Аднак увага да вуліц Гойшыка і Новай сёння патрабуецца павышаная, бо тут значна ўзрос транспартны паток, асабліва грузавой тэхнікі, у сувязі з будаўніцтвам гарадскога квартала. Мы не просім тут класці асфальт, бо разумеем, што гэта велізарныя грошы, але дарожнае пакрыццё на нашых вуліцах патрэбна прывесці ў нармальны стан, каб мы і нашы дзеці маглі без праблем хадзіць і ездзіць, – выказваліся жыхары, што прыйшлі на сход.
І кіраўніцтва Стайкаўскага сельвыканкама, і ДРБУ178 названую праблему ведае і разумее. Але і ў іх існуе рад праблемных пытанняў. Дарожнікі па магчымасці стараюцца не забываць пра міхнавіцкія вуліцы, вось і 19 лютага праводзілася чарговае грэйдзіраванне. Але ўжо на наступны дзень ад праведзеных работ амаль што і следу не было, бо ноччу выпаў мокры снег, днём пайшоў дождж, праехала тэхніка – і ўсё амаль што вярнулася на свае кругі.
– На абслугоўванні ДРБУ-178 знаходзіцца 445 км дарог і 260 км вуліц. У першую чаргу надзяляем увагу дарогам, а ўжо потым вуліцам. Мы праводзім грэйдзіраванне вуліц па заяўках сельвыканкамаў, але патрэбна разумець, што ахапіць адразу ўсе вуліцы мы не можам. Да таго ж грэйдзіраванне праводзіцца пры аптымальнай вільготнасці дарожнага пакрыцця. А пры наяўнасці ападкаў гэта работа дарэмная: будзе толькі гразь, лішні расход паліва і грошай, – паясніў Максім Собаль.
Як адзначыў Мікалай Басалай, грашовыя сродкі, што выдзяляюцца на ўтрыманне і рамонт вулічнай сеткі населеных пунктаў сельсавета, не такія ўжо і вялікія, улічваючы працягласць вуліц і стан іх дарожнага пакрыцця. Каб правесці бягучы рамонт вуліц Гойшыка і Новай у Міхнавічах – падсыпку гравійнай сумессю ў
Прыватныя жылыя забудовы Івацэвічаў растуць з года ў год і паступова акружаюць в. Міхнавічы. Так, да прыкладу, ужо многія сем’і сталі шчаслівымі жыхарамі сваіх дамоў у квартале «Паўднёвы захад 2 чарга», хтосьці падыходзіць да завяршэння будаўніцтва ўласнага жылля там, а хтосьці толькі ў пачатку шляху да дома мары.
18 см, як таго патрабуюць нарматывы, давядзецца заплаціць значную суму сродкаў, а яны прадугледжаны і на ўтрыманне іншых вуліц сельсавета. Выйсце з сітуацыі пакуль бачыцца кампетэнтным службам у грэйдзіраванні пры наступленні спрыяльных пагодных умоў, а таксама падсыпцы гравійнай сумессю кропкава найбольш праблемных месцаў вуліц.
– На наступны год па заяўцы сельвыканкама ДРБУ-178 уключыць у свой план бягучы рамонт названых вуліц, а ў гэтым годзе правядзём падсыпку праблемных участкаў гравійнай сумессю, – адзначыў Максім Собаль.
Выказвалі вяскоўцы і прапановы наконт устаноўкі дарожных знакаў абмежавання хуткасці, а таксама прасілі наогул забараніць уезд грузавога транспарту, пры гэтым арганізаваць для забудоўшчыкаў новага квартала іншыя пад’язныя шляхі. Гэтыя пытанні ўзяў на кантроль старшыня сельвыканкама.
Міхнаўцы спадзяюцца, што іх агучаныя праблемы ў хуткім часе зрушацца з мёртвай кропкі. А пакуль яны застаюцца ў штодзённай павестцы дня вяскоўцаў, «ІВ» працягвае сачыць за сітуацыяй.
Аксана ЦЯРЭШКА. Фота Валерыя МІСКЕВІЧА.