За дрэнную меліярацыю Прэзідэнт жорстка раскрытыкаваў урад
Сітуацыя з выкананнем меліярацыйных мерапрыемстваў у асобных абласцях далёкая ад ідэальнай. Аб гэтым Прэзідэнт Беларусі заявіў 19 снежня на нарадзе па пытаннях развіцця Беларускай нацыянальнай біятэхналагічнай карпарацыі і правядзення меліярацыі. Кіраўнік дзяржавы нагадаў, што год таму на рэспубліканскім семінары-нарадзе па пытаннях аднаўлення і выкарыстання меліярацыйных зямель былі вызначаны цалкам зразумелыя задачы.
– Дамовіліся аб неабходнасці з 2023 па 2025 год аб'ёмы меліярацыйных мерапрыемстваў патроіць адносна паказчыка 2021 года. Патроілі. Але што мяне здзіўляе, зыходзячы з вашых пісанняў: усё паламана, усё зламана, з сотні траншэекапальнікаў толькі адзін працуе і іншае. А як жа ў тры разы павялічылі за гэты год? Вы што, рыдлёўкамі капалі траншэі? Ці вы хочаце выдаць жаданае за сапраўднае? Не атрымаецца, – падкрэсліў Аляксандр Лукашэнка.
Прэзідэнт краіны нагадаў, што губернатары абавязаліся ўвесці ў сельскагаспадарчы абарот у гэтым годзе 110 тыс. га зямель. Аднак, у асобных абласцях сітуацыя з выкананнем далёкая ад ідэальнай.
Для яе выпраўлення ўрад з аблвыканкамамі ініцыююць змяненне структуры выконваемых работ з канцэнтрацыяй рэсурсаў на культуртэхнічнай меліярацыі. На гэта Аляксандр Лукашэнка заўважыў, што культуртэхніка і меліярацыя хоць і падобныя, але розныя рэчы. У першым выпадку размова ідзе проста аб прывядзенні ў парадак сельскагаспадарчых угоддзяў – напрыклад, высечцы хмызняку. Таму Прэзідэнт не разумее, як меліярацыю можна падмяняць такім відам работ. Беларускі лідар заявіў, што яго ўражвае стаўленне адказных службовых асоб да гэтых пытанняў.
– Мною імем рэвалюцыі прынята рашэнне па фінансаванні гэтых работ. Я вас папярэджваў, што мы адрываем, як я часта гавару, ад лякарстваў і іншага для таго, каб выратаваць землі сельскагаспадарчага прызначэння. Таму што 8 мільярдаў долараў у нас экспарт па сельгаспрадукцыі. Чаго нам не хапае? Зямельных рэсурсаў? Дык у нас жа прастойваюць як мінімум паўмільёна гектар – тое, што мы намецілі па меліярацыі. Трэба выратаваць тое, што сёння можна і трэба выратаваць, – паставіў задачу Аляксандр Лукашэнка.