Час цудаў настаў:
На самым масавым за апошнія гады адкрыцці галоўнай ёлкі быў дадзены старт дабрачыннай акцыі «Нашы дзеці»
Г о а р э н
Рэспубліканская акцыя «Нашы дзеці» праводзіцца ў краіне ўжо больш за 25 гадоў. Дзякуючы ёй тысячы дзяцей з няпоўных, апякунскіх, шматдзетных сямей, дзіцячых дамоў у навагоднія святы маюць магчымасць зноў паверыць у цуда, атрымаць падарункі і прыняць удзел у ранішніках, якія з асаблівым клопатам рыхтуюць для іх дарослыя…
У мінулую пятніцу, 15 снежня, старт, бадай, самай чароўнай і чаканай акцыі быў дадзены па ўсёй краіне, у Івацэвіцкім раёне па традыцыі першых яе ўдзельнікаў сустракае ДУДАДЗІМ «Цэнтр дзіцячай творчасці». Сапраўдны дзень нараджэння Дзеда Мароза з тортам і пажаданнямі, гульнямі і карагодамі ў той дзень адзначалі дзеці разам з казачнымі і ляснымі героямі. Дабрачын
ную акцыю адкрываюць як заўсёды ярка, цікава і з запалам, а самымі галоўнымі гасцямі тут былі, канечне, дзеці. Юных гасцей вітала начальнік аддзела па адукацыі Івацэвіцкага райвыканкама Святлана Патоцкая, яна пажадала дзецям моцнага здароўя і веры ў лепшае, веры ў цуда, якое абавязкова здараецца.
У Дзеда Мароза і Снягуркі на свяце была важная місія – сабраць у скрыню 46 канвертаў з пажаданнямі ад прысутных дзетак, выхаванцаў ДУА «Цэнтр карэкцыйна-развіваючага навучання і рэабілітацыі», а таксама гарадскіх дамоў сямейнага тыпу, і развесіць іх на ёлцы ў фае будынка райвыканкама. «Ёлка жаданняў» стала яшчэ больш прыгожай і святочнай, калі на ёй з’явіліся канверты. Так, у той самы дзень усе яны «разляцеліся» па добрых людзях, якія вырашылі падарыць цуда аднаму, а можа, і некалькім дзеткам. Схема па-ранейшаму простая – здымаеш канверт, набываеш падарунак, заказы ў хлопчыкаў і дзяўчынак, як правіла, самыя звычайныя, а пасля прыносіш падарунак да той жа ёлкі. Пазней Дзед Мароз са Снягуркай даставяць іх адрасатам.
Мерапрыемства прадоўжылася вечарам святочным шэсцем Дзедаў Марозаў і Снягурак, 25 пар галоўных герояў навагодняга свята з устаноў адукацыі раёна віталі гараджан і віншавалі з надыходзячым святам. А сёлета на адкрыцці галоўнай ёлкі раёна было як ніколі шматлюдна. Па-першае, яно пачалося пазней звычайнага, каб усе жадаючыя пасля працоўнага дня разам з дзецьмі маглі раздзяліць радасць у той вечар. Падругое, многім было цікава ўбачыць ва ўсёй красе новую ёлку-прыгажуню. Напярэдадні года Дракона на плошчы ўстанавілі штучнае 15-мятровае дрэва, і як замігціць новая ілюмінацыя, зорачкі і агеньчыкі, не ведаў ніхто…
А на сцэне пачалася дзея. Усе прысутныя на некаторы час сталі жыхарамі Івацэвіцкага царства, сустракалі Цара, які абвясціў, што цукерак у царстве хапае на ўсіх, а значыць, і святу навагодняму абавязкова быць. Аднак, па класіцы жанру, Лясун і Баба Яга паставілі пад рызыку святкаванне Новага года. Усё скончылася добра: тры неабходныя цуды былі здзейсненыя, а галоўная ёлка замігцела рознымі агнямі…
Ганаровае права запаліць сімвал свята было дадзена старшыні Івацэвіцкага райвыканкама Уладзіміру Бялову, але найперш ён звярнуўся да прысутных з самымі цёплымі і шчырымі пажаданнямі:
– Сёння ў краіне распачалася рэспубліканская дабрачынная акцыя «Нашы дзеці», і наш раён таксама далучыўся да яе. На ёлцы ў будынку райвыканкама з’явіліся канверты з лістамі ад дзяцей. Я таксама прымаю ўдзел у акцыі і буду рады здзейсніць мару аднаго дзіцяці ў гэты Новы год. А ўсім вам я жадаю здароўя і шчасця, лічу, што дзякуючы ўсім адказным службам нам удалося падарыць жыхарам раёна сапраўдную казку, і новая ёлка прыйдзецца даспадобы нашым дзецям. Няхай надыходзячы год будзе лепшы за папярэдні!
Далей загарэлася ёлка, і на плошчы адразу стала казачна… Разам з героямі, Сняжынкамі і Снегавікамі, Царом і Лесуном, Скамарохамі і Бабай Ягой, дарослыя і дзеці стварылі вялізны карагод. Жадаючыя сагрэцца частаваліся чаем і цукеркамі ад мясцовага прыватніка, гаспадара магазіна «Бум» Міхаіла Міз
гіра. За дзве гадзіны дзяўчаты і юнаківаланцёры раздалі 850 кубкаў чаю і 1 000 штук цукерак! Дарэчы, Міхаіл Мізгір дзякуе за дапамогу ў арганізацыі хрысціянам цэркваў Веры Евангельскай.
Яшчэ адна навінка гэтага года – навагодні кірмаш, чатыры драўляныя домікі з’явіліся на плошчы тыдзень таму. На адкрыцці можна было набыць прадукцыю народных майстроў раёна: вязаныя рэчы, бірулькі, шкатулкі і многае іншае куплялі людзі ў падарункі родным і блізкім. Яшчэ ў двух доміках гандлявала Івацэвіцкае райспажыўтаварыства, нехарчовыя тавары карысталіся попытам, але ў топе былі таксама бліны, хот-догі, гамбургеры. Малыя беглі да гандлёвых кропак з цацкамі на любы густ ды на батуты. Людзі доўга не разыходзіліся, не пужаў нават невялічкі мароз у той вечар, але калі таксама станцуеш у карагодзе са Снягуркамі ды казачнымі героямі… Галоўная ёлка адкрытая, яна радуе вока гараджан і будзе радаваць яшчэ доўга. Усе мы зараз у чаканні самых чароўных святаў, усе ў чаканні цуда…
Наталля ГЕРБЕДЗЬ, фота аўтара
і Таццяны ДЫЛЮК.