Vanhorntakonramën, SHBA: Shqipëria, rol për paqen dhe zhvillimin në rajon
Takimi i parë me kryeministrin, e ngarkuara me punë në ambasadën amerikane: Ndajmë miqësi të fortë dhe vlera të përbashkëta
Që prej marrjes së detyrës në fillim të këtij, muaji si e Ngarkuara me Punë e Shteteve të Bashkuara të Amerikës, Nancy Vanhorn, është takuar me krerët më të lartë të shtetit dhe anëtarë të kabinetit qeveritar. Diplomatja amerikane dje takoi Kryeministrin Edi Rama, për të përgëzuar miqësinë dhe vlerat e përbashkëta mes vendeve si aleatë të NATO dhe partnerë strategjikë. Takimin e konfirmoi ambasada amerikane përmes një njoftimi ku bën të ditur se SHBA dhe Shqipëria janë vende aleate në NATO dhe partnerë strategjikë. Vanhorn po ashtu rikonfirmoi mbështetjen e qeverisë së SHBA në rolin që ka Shqipëria për të çuar përpara paqen dhe zhvillimin në të gjithë rajonin. “Sot, e Ngarkuara me Punë e SHBA, Nancy Vanhorn, u takua me Kryeministrin Edi Rama për të përgëzuar miqësinë e fortë dhe vlerat e përbashkëta mes vendeve tona si aleate në NATO dhe partnerë strategjikë. Zonja Vanhorn rikonfirmoi mbështetjen e palëkundur të qeverisë së Shteteve të Bashkuara në rolin që ka Shqipëria për të çuar përpara paqen dhe zhvillimin në të gjithë rajonin”, - thuhet në njoftimin e Ambasadës së SHBA. Ky është takimi i parë i diplomates amerikane me Kryeministrin Edi Rama që kur ajo u emërua në detyrën e të ngarkuarës me punë të misionit amerikan në Tiranë. Më herët, Nancy Van Horn është takuar me Presidentin Bajram Begaj, kryetaren e Kuvendit Elisa Spiropali, si dhe ministrin e Jashtëm, Igli Hasani dhe atë të Mbrojtjes, Pirro Vëngu. E Ngarkuara me Punë e SHBA- ve në Tiranë, Nancy Vanhorn, mori detyrën më 5 gusht, duke zëvendësuar në këtë detyrë David Wisner. Në mesazhin e saj të parë në Shqipëri, diplomatja amerikane u shpreh se, “do të punojë në vendin tonë për të promovuar vlerat demokratike, për të rritur sigurinë, ekonominë dhe bashkëpunimin si aleatë të NATO- s”. Gjatë ditës së djeshme, e ngarkuara me Punë e SHBA, Nancy VanHorn, zhvilloi një takim me ministrin e Shtetit për Marrëdhëniet me Parlamentin, Taulant Balla. Gjatë takimi Vanhorn dhe Balla diskutuan mbi prioritetet legjislative të Shqipërisë. “Duke i trajtuar këto fusha thelbësore së bashku, ne sigurojmë transparencë, llogaridhënie, qeverisje më të mirë dhe angazhim publik”, - theksohet në postimin e ambasadës së SHBA- ve në rrjetet sociale. Gjatë ditës së djeshme diplomatja amerikane Nancy Vanhorn zhvilloi një takim me Kryeministrin Edi Rama, gjatë të cilit u theksua miqësia dhe vlerat e përbashkëta mes Shqipërisë dhe SHBA- ve, si aleate në NATO dhe partnerë strategjikë.