Gjashtë për qind shtesë për çdo vit pune pas pensionit, skema e përfitimit
Shtesa tërhiqet vetëm pas ndërprerjes së punës dhe daljes në pension. Vetëm të vetëpunësuarit nuk paguajnë sigurime gjatë kësaj kohe
Për çdo vit pune pasi kanë mbushur moshën e daljes në pension, pensionistët përfitojnë një shtesë prej 6 për qind ose 0.5 për qind për çdo muaj pune.
Dhe për të marrë shtesën e përmendur, i vetmi kusht që duhet të përmbushin pensionistët është që gjatë kohës që janë në punë, të marrin vetëm pagën dhe jo masën e pensionit që iu takon. Në momentin e shkëputjes së kontratës, aplikohet edhe shtesa mbi masën e përcaktuar të pensionit. Kështu, ata trajtohen si çdo i punësuar tjetër, duke derdhur veç pagës, edhe detyrimet e sigurimeve shoqërore e shëndetësore. Të vetmit që përjashtohen nga kontributet janë të vetëpunësuarit. Ekspertët, në mënyrë të vazhdueshme, kanë kërkuar që pensionistët, të cilët punojnë, të përjashtohen nga derdhja e kontributeve. Por një propozim i tillë nuk është marrë në konsideratë nga Instituti i Sigurimeve Shoqërore.
SKEMA E PENSIONEVE
Aktualisht, skema publike e pensioneve ofron tri lloje pensionesh: pensionin e pleqërisë, të invaliditetit dhe atë familjar. Për të fituar të drejtën e një pensioni pleqërie, individi duhet të kontribuojë për një periudhë sigurimi të përcaktuar jo më pak se 15 vjet dhe mund të marrë pension kur mbush moshën 65 vjeç për burrat dhe 61 vjeç 8 muaj për gratë, të cilat në vitin 2032 do të arrijnë moshën 65 vjet. Nga ky rregull bëjnë përjashtim punonjësit e nëntokës dhe nënat me shumë fëmijë, të cilat dalin në pension në moshën 50 vjeç. Gjithashtu, një kategori e veçantë e punonjësve që kanë punuar mbi 20 vite në industrinë e naftës, mund të marrin pension të parakohshëm në moshën 60vjeçar. Prej janarit të këtij viti, mosha e daljes në pension për burrat vijon të jetë 65 vjeç, ndërsa për gratë është rritur me 2 muaj, përkatësisht është 61 vjeç e 8 muaj. Veç kësaj, ka ndryshuar edhe portofoli i sigurimeve. Kështu për të përfituar pension të plotë pleqërie duhet që ata të cilët dalin rrishtazi në pension të kenë jo më pak se 38 vite e 4 muaj.
SHEMBULL
Çdo njeri që shtyn moshën e daljes në pension, kur ndërpret marrëdhënien e punës, mund të përfitojë një shtesë që
është 6 për qind për çdo vit të shtyrjes së moshës së daljes në pension. Konkretisht, një mësues në sistemin arsimor privat, që qëndron deri në moshën 70 vjeç në marrëdhënie pune, atëherë ai do të marrë një shtesë që shkon 30 për qind të pensionit. Në vendin tonë është lejuar që pensionistët, krahas pensionit, të marrin edhe pagën, por janë të detyruar që meqenëse marrin pagë, të paguajnë kontributet.