Vranë 72- vjeçarin, trupi u hodh në përrua, shkon në 4 numri i të arrestuarve
I kërkuari për drogë fshihej në shtëpinë e gjyshit dhe kishte frikë nga denoncimi. Gjyshërit nxitën nipin 23 vjeç të kryente vrasjen
Të shtëna me armë zjarri janë regjistruar gjatë një operacioni antikanabis në Malësi të Madhe. Sapo trafikantët kanë parë efektivët e policisë në terren, kanë qëlluar me armë zjarri dhe janë larguar nga vendi i ngjarjes.
Një djalë, vetëm 23 vjeç, i shpallur në kërkim prej disa muajsh nga sektori i Antidrogës, fshihej në shtëpinë e dajave të tij në Memaliaj. I riu është bërë autor i një krimi të rëndë, që dyshohet që është shtyrë nga dy gjyshërit e tij, nga frika se Faik Ajdini e dinte se djali ishte në kërkim dhe do të raportonte në polici. Sherri në fakt, në dukje, ka nisur për disa pemë, por sipas hetimit të Policisë së Gjirokastrës, ka qenë vetëm shkaku për të shkuar në aktin horror të rrëmbimit dhe vrasjes së 72- vjeçarit. Sipas të dhënave të policisë, vrasjen e ka kryer i riu, i cili strehohej në shtëpinë e fqinjit të viktimës, ndërsa pjesa tjetër janë kujdesur që të zhdukin trupin e bashkë me të edhe gjurmët. Të dhënat për ngjarjen janë bërë me dije ditën e djeshme nga kryepolici i Gjirokastrës, Ardian Çipa, i cili deklaroi se ka vënë në pranga 4 persona dhe janë gjendur edhe mjetet me të cilat është realizuar krimi i rëndë.
POLICIA PËR NGJARJEN
Zbardhet vrasja e 72vjeçarit Faik Ajdini të ndodhur më 19 gusht 2024 në fshatin Zhapokik 2 të Memaliajt në Gjirokastër. Kur i moshuari nuk kishte shkuar në banesë, familjarët kishin nisur kërkimet duke e gjetur të pajetë shumë orë më vonë në një përrua. Nga këqyrja paraprake e kufomës u kuptua se kishim të bënim me vrasje të shkaktuar me mjet prerës. Tri ditë më pas policia e Gjirokastër zbardhi krimin dhe arrestoi autorët. Katër bashkëfshatarë, Skënder Ajdini, 71 vjeç dhe bashkëshortja e tij Darovi Ajdini, 64 vjeçe, nipi i tyre Blerti Kanushi, 23 vjeç dhe djali i tyre, Bledar Ajdini 43 vjeç. 23vjeçari rezulton me precedentë të mëparshëm penalë, pasi rreth 7 muaj më parë ishte shpallur në kërkim për trafik kokaine. Mësohet se më 6 shkurt Sektori i Antidrogës në Policinë e Tiranës arrestoi dy persona dhe shpalli në kërkim bashkëpunëtorin e tyre 23- vjeçarin Blerti Kanushi, i cili kishte rolin e ndërmjetësuesit në grupin e shpërndarjes së lëndës narkotike. Vetë drejtori i policisë doli në një deklaratë për median për të treguar dhe dinamikën e vrasjes që ka ndodhur në orën 07: 00 të mëngjesit të 19 gushtit. Çifti i bashkëshortëve, Skënder dhe Darovi Ajdini, e kanë nxitur nipin e tyre për të vrarë bashkëfshatarin. Madje, kanë krijuar kushtet dhe siguruar mjetet. Pas krimit ata kanë ndihmuar për të zhdukur provat, ndërsa autori është larguar. “Nga dinamika hetimore u konkludua se për shkak të konflikteve për motive të dobëta ndërmjet viktimës, shtetasit Faik Ajdini dhe bashkëshortëve Skënder dhe Darovi Ajdini, këta të fundit kanë nxitur shtetasin Blerti Kanushi, 23 vjeç, i kanë krijuar kushtet dhe i kanë siguruar mjetet për kryerjen e vrasjes. Ky shtetas, në bashkëpunim me shtetasin Skënder Ajdini, më datë 19 gusht 2024, rreth orës 07: 00 të mëngjesit, kanë kryer vrasjen me thikë të shtetasit Faik Ajdini dhe më pas Blerti Kanushi është larguar nga vendi i ngjarjes. Pas kryerjes së krimit, Skënder Ajdini me shtetasen Darovi Ajdini kanë kryer veprime aktive për pengimin e zbulimit të së vërtetës, duke bërë përpjekje për të zhdukur provat e krimit. Shtetasi Bledar Ajdini, në dijeni të plotë për krimin, ka përkrahur autorin e krimit, duke mos informuar institucionet ligjzbatuese për vendndodhjen e tij”, - tha drejtori i Policisë së Gjirokastrës, Ardian Çipa.
HETIMET
Pasi u zbulua se kishim të bënim me një vrasje dhe jo vdekje u ngrit një grup i posaçëm hetimor, për të hetuar dhe zbardhur këtë ngjarje të rëndë, si dhe për të sqaruar rrethanat e ndodhjes së saj,
Hetimet u kryesuan nga prokurori i Prokurorisë së Juridiksionit të Përgjithshëm Gjirokastër z. Bledar Bala dhe i përbërë nga 2 zëvendësdrejtorët e Drejtorisë Vendore të Policisë Gjirokastër, specialistë të Seksionit për Krimet e Rënda, Shefi i Komisariatit të Policisë Tepelenë, Shefi i Stacionit të Policisë Memaliaj, specialistë të Seksionit të Policisë Shkencore, ekspertë mjeko- ligjorë, si dhe struktura të tjera të Drejtorisë Vendore të Policisë Gjirokastër. Për thellimin e hetimit u fiksuan dhe u morën për ekzaminime të mëtejshme sende dhe mjete të cilat dyshohej se kishin lidhje me rrethanat e ngjarjes dhe që ekzaminimi i të cilave do të identifikonte autorin dhe do të dokumentonte me prova ligjore ngjarjen. Shumë persona u morën në pyetje, u bënë verifikime, kontrolle dhe ekspertime. “Nga hetimet intensive, inteligjenca policore, deklarimet e ndryshme dhe ekzaminimet biologjike të provave, u arrit të sqarohet motivi dhe të dokumentohet me prova ligjore autorësia e kësaj ngjarje të rëndë, me pasojë vdekjen e shtetasit Faik Ajdini”, - tha drejtori i policisë së Gjirokastrës Çipa.
ARRESTIMET
Pasi u sqaruan rrethanat e ngjarjes, nisi puna për lokalizimin dhe arrestimin e Blerti Kanushit dhe sekuestrimin e të gjitha provave që dokumentonin autorësinë e tij në këtë krim të rëndë. Më datë 20 gusht 2024 në orën 23: 30 janë arrestuar në flagrancë shtetasit:
Skënder Ajdini, 71 vjeç për veprat penale “Vrasja me paramendim” e kryer në bashkëpunim, “Sigurimi i kushteve dhe mjeteve materiale për të kryer vrasje” dhe “Përkrahja e autorit të krimit”, parashikuar nga nenet 78/ 25, 80 dhe 302 të Kodit Penal.
Bledar Ajdini, 43 vjeç, për veprën penale “Përkrahja e autorit të krimit”, parashikuar nga neni 302 i Kodit Penal.
Dy ditë më pas më datë 22 gusht ora 03: 00 u arrestua në flagrancë Blerti Kanushi, 23 vjeç për veprën penale “Vrasja me paramendim”, kryer në bashkëpunim, parashikuar nga neni 78/ 25 i Kodit Penal. Gjithashtu prangat iu vunë edhe Darovi Ajdini, 64 vjeçe, për veprat penale “Veprime që pengojnë zbulimin e së vërtetës” dhe “Përkrahja e autorit të krimit”, parashikuar nga nenet 301 dhe 302 i Kodit Penal.
Policia ka arritur të gjejë, fiksojë dhe sekuestrojë në cilësinë e provës materiale dhe thikën me të cilën ka kryer krimin autori, si dhe sende e mjete të tjera të cilat kanë influencuar në rrethanat e ngjarjes, të shfrytëzuara nga të dyshuarit. Këto sende dhe mjete do t’u nënshtrohen ekzaminimeve të mëtejshme shkencore.