Zhduket Kushtrim Selimi, shefi i AMP shantazhonte drejtues policie
Kërkohet për ndërtim në tokën e zaptuar, por nuk gjendet në shtëpi Dyshohet se ka shkuar në Britani, ish- kreu i AMP Durrës ishte lënë i lirë nga gjykata. Kaloi në Kosovë dhe iku me linjë ajrore
Zbulimi i ndërtimit të një vile në tokë të zaptuar ka vënë në lëvizje autoritetet kërkuese dhe hetuese.
Për pasojë është mësuar se vila ishte në pronësi të një emri të njohur në Durrës e jo vetëm. Bëhej fjalë për Kushtrim Selimin, i shpallur në kërkim për shantazhim ndaj punonjësve dhe drejtuesve të policisë, ai u vetëdorëzua dhe me pas u la të hetohej në gjendje të lirë. Po kur Policia kërkoi që ta vinte sërish në pranga, pasi ekziston një urdhërarrest me burg për të, ai nuk u gjend në banesë e Policia dha alarmin se Kushtrim Selimi, ish- drejtuesi i AMP Durrës ishte zhdukur. Policia kërkoi në Tims për ta gjurmuar Selimin, por ai nuk rezultoi të kishte dalë me anë të sistemit, atëherë dyshimet ranë mbi mundësinë e ikjes nga Kosova, ku është përdorur aeroporti i Prishtinës për lëvizjen drejt destinacionit të preferuar, ku mendohet të ketë shkuar në Britaninë e Madhe.
URDHËRARRESTET
I vënë në qendër të vëmendjes së mediave pak muaj më parë për portalin e tij denigrues dhe shantazhues ndaj drejtuesve kryesorë të Policisë së Shteti, ish- shefi i Sektorit në Agjencinë e Mbikëqyrjes Policore në Durrës, Kushtrim Selimi, është shpallur sërish në kërkim, kësaj here për zaptimin e një trualli. Bashkë me Selimin në “arrest në burg”, Gjykata e Durrësit firmosi edhe 6 vendime të tjera, më konkretisht “Arrest në burg” për Metin Voglin, “pezullim nga detyra” për 4 efektivë policie, Edmond Plaku, Skënder Sakaj, Kastriot Karafili dhe Ardian Jonuzi. Ndërkohë, për ishsekretaren e Kushtrim Selimit, Regjina Omeri, po ashtu e përfshirë në skandalin e portalit shantazhues u caktua masë “Detyrim paraqitje” për moskallëzim krimi. Por, jo të gjitha masat u ekzekutuan nga AMP. Kushtrim Selimi nuk është gjetur në banesë. Burime bëjnë me dije se ka mundur të arratiset përmes Kosovës dhe nga aeroporti i Prishtinës ka udhëtuar në drejtim të Britanisë së Madhe, duke u shpëtuar prangave edhe pse ishte në masë “detyrim paraqitje” për portalin që prodhonte lajme denigruese. I paarrestuar është edhe Metin Vogli. Gjatë kohës që verifikohej veprimtaria e tij denigruese në portal, hetuesit arritën të gjejnë një tjetër veprimtari kriminale të tij. Kushtrim Selimi rezulton se gjatë kohës që ka ushtruar detyrën e shefit të sektorit pranë AMP Durrës, duke shfrytëzuar atributet që i jepte pozicioni, ka zaptuar një sipërfaqe trualli, pronë shtetërore në lagjen “Kallm” të Durrësit. Në këtë pronë, Selimi ka ndërtuar në mënyrë të jashtëligjshme një vilë. Ai është në akuzë për 3 vepra penale, nga shpërdorimi i detyrës në bashkëpunim, te ndërtimi pa leje e deri te vjedhja e energjisë elektrike, vepra penale të kryera në bashkëpunim me Metin Voglin.