Shtëpia e barit në Tepelenë, konsumi i lartë i energjisë zbuloi bimët narkotike
Pas “shtëpisë së barit”, policia e Gjirokastrës zbulon edhe pajisje kriptomonedhash, dyshohet edhe për ambiente e persona të tjerë
Në policinë e Gjirokastrës mësohet se ka shkuar një informacion për konsum të madh të energjisë elektrike në një zonë.
Menjëherë janë angazhuar forcat e policisë në terren, ku në mbledhjen e informacioneve kanë bërë të mundur të zbulojnë edhe një ambient të përshtatshëm për kultivimin e bimëve narkotike. Policia përgjatë kontrollit ka bërë me dije se janë zbuluar rreth 230 bimë, ndërsa ambienti kishte të gjitha kushtet për ta kryer procesin e kultivimit në mënyrë të duhur. Me llamba që merrnin edhe energjinë elektrike që ka çuditur punonjësit e elektrikut, ambienti në fakt, sipas policisë kryente edhe aktivitet tjetër po kriminal. Janë shoqëruar 4 persona ndërsa policia nuk bën me dije emrat e tyre. Dyshohet se ka edhe persona të tjerë të përfshirë në aktivitetin kriminal që u zbulua na kultivimin e kanabisit, por edhe në prodhimin e kriptomonedhave. Policia lokale pretendon të vijojë operacionin në të gjithë territorin e Tepelenës për të parë nëse ka edhe objekte të tjera që shërbejnë për kultivim droge.
KËRKIMI PËR DROGËN
Policia lokale në Qarkun Gjirokastër po ushtron kontrolle antikrim për ekzistencën e mjediseve të kultivimit të kanabisit me llamba si dhe prodhimin e kriptomonedhave. Nga operacioni policor janë konstatuar dy mjedise të dyshuara për kultivimin e kanabisit me llamba. Dyshohet se dy banesa përkatësisht në qytetin e Tepelenës dhe rrethina funksiononin si shtëpi bari për kultivimin e kanabisit me llamba. Gjithashtu, gjatë kontrolleve të policisë në një tjetër banesë në Tepelenë janë zbuluar një pajisje kriptomonedhash.
Policia ka evidentuar faktin se në këto tri mjedise ka pasur mbifaturim të energjisë elektrike, çka ka nxitur dyshimet për përdorimin e tyre për veprimtari të jashtëligjshme. Në lidhje me këto raste, policia lokale ka shoqëruar katër persona dhe po vazhdon intensivisht hetimet për të mësuar se cilët janë personat që kanë organizuar aktivitetin kriminal.
SHTËPITË E BARIT
Policia e Gjirokastrës bëri me dije se ka zbuluar ditën e djeshme një shtëpi bari në zonën e Kurveleshit, konkretisht në rrugën e fshatit Veliqot. Pas disa informacioneve për prezencën e kanabisit në zonë, policia ka ndërmarrë një aksion, ku ka gjetur një ambient të mbyllur, e cila më pas rezultoi se ishte përshtatur si shtëpi bari. Në këtë banesë, e cila ishte ngritur infrastruktura e nevojshme për rritjen e bimëve narkotike, me llamba që furnizoheshin me energji elektrike, janë gjetur të paktën 230 rrënjë kanabisi. Ndër të tjera, mësohet se policia ka shoqëruar në Komisariatin e Tepelenës 4 persona, ku njëri prej tyre dyshohet se është kryesori në këtë vepër të jashtëligjshme. “Në zbatim të masave për parandalimin dhe goditjen e tentativave për kultivim të bimëve narkotike kanabis sativa në terren apo në ambiente të mbyllura me llamba, shërbimet e Komisariatit të Policisë Tepelenë dhe ato të Drejtorisë Vendore të Policisë Gjirokastër kanë intensifikuar kontrollet. Si rezultat i kontrolleve dhe inteligjencës policore shërbimet e Drejtorisë Vendore të Policisë Gjirokastër dhe shërbimet e Komisariatit të Policisë Tepelenë në bashkëpunim me shërbimet e OSHEE- së, në rrugën e fshatit Veliqot kanë zbuluar një ambient ( shtëpi e pabanuar) të përshtatur me llamba që furnizoheshin me energji elektrike, për kultivim të bimëve narkotike kanabis sativa në vazo”, - bën me dije deri tani policia. Ndërkohë vijoni aksioni policor për identifikimin e personave të tjerë të përfshirë në këtë veprimtari kriminale.