Manastirliu: U dhanë 210 bursa sa paga minimale, 80 nga Bujqësori
Mbi dyqind studentë kanë përfituar nga programi i bursave në vlerën e një page mujore. Këtë e bëri me dije vetë ministrja e Arsimit Ogerta Manastirliu gjatë një takimi me studentët e degëve prioritare të Universitetit Bujqësor të Tiranës. “Tashmë janë bërë efektive 210 bursa sa paga minimale që janë vënë në dispozicion të Universiteteve tona, 80 prej të cilave janë bursa që janë përfituar nga Universiteti Bujqësor i Tiranës dhe pikërisht në degët e studimit sikurse është Inxhinieria Agrare, Inxhinieria Pyjore, Biomarina, Akuakultura dhe degë të tjera të rëndësishme për zhvillimin ekonomik dhe zhvillimet territoriale në tërësi”, tha Manastirliu. Në fokus të degëve prioritare për këtë vit janë Inxhinieria Agrare me profile të ndryshme, Biologjia Marine dhe Akuakultura, Shkencat Mjedisore dhe shumë degë të tjera, që dëshmojnë gamën e gjerë të programeve që synojnë të përgatisin profesionistë të kualifikuar për sfidat aktuale dhe të ardhshme në sektorët përkatës. “Bursat sa paga minimale janë një mbështetje për studentët, për programet tona me interes strategjik për vendin por kjo është dhe një garanci më shumë që nesër të kemi profesionistë të kualifikuar në këto fusha që janë me interes për sektorët zhvillimor, por gjithashtu janë me interes dhe për tregun e punës. Por nga ana tjetër, kjo është një garanci për një punësim të sigurt nesër”. Manastirliu vuri theksin dhe te rëndësia e programeve të përbashkëta dhe diplomave dyfishe të universiteteve tona me institucione të njohura ndërkombëtare, duke u siguruar studentëve një perspektivë globale dhe mundësi të mëdha për zhvillim profesional.